Hebrews 1
Nitna ne Moroa I Silok Ti Lubung Angelo
1Ganoxa ne Moroa ga vaase ri lavalabat atdik at levenngusno nedi lavaeme vapaase alii, at levengkonaleng getgesara la at leventaangas axap. 2Ketla at na levenaleng melemu at lovotpot at ne Iesu, Moroa ira paase nga ridik limixin nuunu at lungusno ne Nitna. Neni ga soxolik ka i xusu naba ruuna ka levempanga axap, la keneng at ne Iesu, ne Moroa ga rudum li levempanga axap. 3Ne Nitna i lox asuusu lisisixam at ne Moroa la ni lampenaxa rinotno ren. Ne Nitna i lok tatao levempanga axap at na lavatbung menemen la mo levempanga i mumu asu levelinga ren i lolos aleng. Neni ga lok langas ti limixin kusu dina dadat basinge laxakapmek; melemu at na, neni ga xis to at lekngen tino at ne Moroa i silok to vana at laxalibet. 4Kuren la neni ga ruuna ka lixitkis silok mavana at lubung angelo, kerekngan mo laasen neni ga ruuna ka vam i, ni laasen i silok tidi.5Moroa goxo vaase ri tara ta angelo do,
“Nenu ne Nuruk, ningina nenia a lok ngan ne Tamam.” a
La ni goxo vaase mumu taangelo xeretna,
“Nenia aba lok ngan ne Temen, la neni ba lok ngan ne Nuruk.” b
6La at loxonaleng ne Moroa ga riki asi lamdak avot teren ude xopok ti na lavatbung menemen, neni ga lok,
“Lubung angelo axap tarak dina lotu saparav i.” c
7Moroa ga vaase mumu lubung angelo la neni ga lok,
“Nenia a lok lubung angelo rak dip tava soso mene ngan lamanman, la nedi di lok ngan lavasaxaruki rak la di lolos ngan levenbabao at laxao.” d
8Ketla neni ga lok ti ne Nitna xeretna,
“Nenu ne Moroa, lixitkis orong taram naba nemen amisik la amisik la nenu uba lok limixin axap kusu diba mu asu loklok mokmokso ram. 9Nenu u vavara aleng ti lomokmokso la u xopara ri laxakapmek; kuren la Moroa, ne Moroa ram ira suxa aumsu vam u mi lomomo i silok aleng, mo i volo lomomo atnedi larapen tangas taram.” e
10Neni ga lok bok ti ne Nitna xeretna,
“Nenu Leeme Silok, ganoxa at lereot uga rudum li lavatbung menemen mi laxalibet mi lukngam. 11Na levempanga uga rudum li di, naba sonao la diba lok ngan lempanga gamasa, ketla nenu uba rooro amisik. La dinaba rem teterek ngan labantamon. 12Uba vegun pes di ngan labanmo mikmidi, la ngan lavanga singsiga uba soxun kepe i, ketla nenu xopmen unak lox ekun lodoxoma ram, la kopmen bok taxavaxap at lorooro ram.” f
13Moroa goxo vaase ri tara atnedi lubung angelo xeretna do,
“Una xis de at lakngak tino, se nenia aba lok nedi di munepen minu, ngan loxot burubut ti luxangkedek taram.” g
14Lubung angelo nedi leventoonan avukat mun, dik lok tooro ne Moroa; la neni ik sak tiki di rik lok tooro nedi limixin ne Moroa ga soxolik ka vam di xusu dinaba lok kaka loklox arooro.
Copyright information for
MMX